Bigg Boss Marathi 6 Se Bahar Aate Hi Sonali Raut Ka Bada Khulasa, Boli: “Pehle Hi Hafte Mein Mujhe Serious Infection Ho Gaya”

 Bigg Boss Marathi Season 6 se eliminate hone ke baad actress aur model Sonali Raut ne show ko lekar ek bada khulasa kiya hai. Ghar ke bahar aate hi Sonali ne Bigg Boss ke andar ke apne experience par khulkar baat ki aur bataya ki unhe show ke pehle hi hafte mein serious health issue ka samna karna pada.

Ravivaar ko hue Bigg Boss Marathi 6 ke second elimination mein Sonali Raut ka safar khatam ho gaya. Elimination ke baad pehli baar ek interview mein unhone Bigg Boss house ke andar ke experience share kiye, jisme unhone apni beemari aur infection ka bhi zikr kiya. Sonali ke is revelation ke baad fans kaafi concerned dikh rahe hain.

Sonali ne kaha,
“Pehle hafte mein sab contestants se milne ke baad experience kaafi achha tha. Kuch log mujhe pehle se jaante the aur unhe lagta tha ki agar koi fight hogi to woh mere saath hi hogi. Pehle hafte mein fights meri wajah se hi shuru hui aur groups bhi pehle se hi ban chuke the.”

Sonali ne aage bataya ki teesre ya chauthe din hi unhe infection ho gaya. Unhone kaha,
“Bigg Boss ka ghar ekdum different hota hai. Garden area bhi completely open nahi hota. Sab contestants alag-alag background se aate hain aur jab sab ek saath rehte hain to kahin na kahin hygiene compromise hota hi hai. Isi wajah se mujhe infection ho gaya aur iska mere game par bhi kaafi asar pada.”

Health issues ki wajah se Sonali second week mein zyada active nahi reh paayi. Unhone kaha ki woh zyada tar time doosre contestants se door hi rahi kyunki unki tabiyat theek nahi thi aur woh kisi activity mein participate nahi kar pa rahi thi.

Jab unse poocha gaya ki ghar mein unka khayal kaun rakhta tha, to Sonali ne kaha,
“Sabhi meri care kar rahe the, main bhi apna dhyan rakh rahi thi. Ek task tha jisme ganda kaam karna tha, woh maine jaanbujhkar nahi kiya kyunki mujhe pata tha ki usse meri tabiyat aur kharab ho sakti hai.”

Sonali ne yeh bhi bataya ki unhone kai baar kapde change karne ki request ki, lekin unki condition koi theek se samajh nahi paaya. Doctors aaye, medicines di gayi, lekin koi khaas fayda nahi hua.
“End mein clear ho gaya tha ki mujhe ghar ke bahar aakar hi proper treatment lena padega. Abhi bhi mera treatment chal raha hai,” Sonali ne khulasa kiya.

Sonali Raut ka yeh confession Bigg Boss Marathi 6 ke fans ke liye kaafi shocking hai aur unki health ko lekar log unke liye prayers kar rahe hain.